स्वरलता...

भारतरत्न. लता दीदींच्या पवित्र स्मृतीस माझ्या या शब्द-कळ्यांची आदरांजली...   

कधी शौर्यता

ज्वलंत होतंसे स्वरांनी..

कधी शांत-शीतल

झरतंसे अंगाई..

कधी बालगीते-

कधी संतवाणी..

कधी प्रेमगूंजन-

कधी विरहविराणी..

जिने माळियेली

ही हृद्य भावसुमने..,

अशी स्वरलता

आता न होणे..

दरवळावा तिचा षड्ज 

उगवत्या दिशेसी..

मध्यान्ही मिळावी

साथ पंचमाची..

निषादीय चांदण्यांची

स्वप्निल धुंदी..

सप्तकांनी सजावी 

रोज दैनंदिनी..

जिच्या या स्वरशृंखलांची

आसमानी तोरणे..,

अशी स्वरलता

आता न होणे..

तिचा स्वरनिनाद

घुमतसे वंद्यस्थानी..

एकजूट - एकसंध

राष्ट्राभिमानी..

जिची गानप्रतिभा 

ही एकचि अनंते..,

अशी स्वरलता

आता न होणे..

- चारुश्री वझे