रंगताना रंग ओले
रंगवेड्या नभावरी
पाहता श्रांत बैसते
सांजसखी काठावरी
पसरते भवताली
संध्यामग्न सायधुके
जळांत वाहून जाते
घनगर्द नवलाई
उरता काहीबाही
बुडते खोल डोही
परतीचा मार्ग धरिते
सांजसखी निर्मोही
----------------------
नेमका निखळतो चंद्र
नेमकी साधतो वेळ
सांजेच्या वळत्या पाऊली
ओथंबते चंद्रावळ
----------------------
थबकते सांज देखता
खोल-सखोल तळाशी
रंगल्याली कोर चमके
तरळती युगराशी
ती बिंब बिंब स्पर्शुनी
जाता पाण्यावर ओलावुनी
चंद्र लख्खं लख्खं गहिवरतो
तिच्या ढळत्या समयी
----------------------
रंगांत रंगल्या जळांत
आता एकसंध रंग
निथळे शुभ्र चंद्रकांती
सखीच्या ओलखुणांत
- चारुश्री
No comments:
Post a Comment